E don tey gan wen I dey nack una sweet, sweet tori about wetin I dey take my eye see for Lagos roads everyday for dis my taxi driver work.
Today, me sef wan relax and hear una dey talk.
Una kukuma know say tomorrow na Father’s Day for di hole world. Na im make, as better father and husband, I wan make all di people wey dey read my tori happy well well – father o, mother o, pikin o, brother o, sister o, etc etc.
I get 20k wey I wan dash una, but no be free o. After all, noting for dis world be free. Dem even dey talk am for Oyibo say, “Diaris no free food even for Freetown”.
Dis money wey dey my hand so, na for anybody wey go give correct answer to ALL di 10 question dem wey I wan ask about Oga MAT and im taxi driver work.
Make afraid no catch you, dis one no be JAMB question – dis one no mago mago, no America Wonder. And no be kalokalo like Ponzi. Dis one, if you get am, you don get am be dat.
1. Wetin be di name of Oga MAT wife and dia two woman pikin dem?
2. What part of Lagos gan gan Oga MAT dia garage dey?
3. List name of any 3 member dem for Oga MAT dia union branch
4. Who be Sikiratu and wetin be di sweet name wey Oga MAT dey call am?
5. Every evening wen Oga MAT close for work, e dey go nack im Usual for one joint before e begin go house. Wetin be di name of dat joint?
6. Which area for Lagos Oga MAT dey live with im family?
7. Wetin be di name of Oga MAT landlord?
8. State in not more dan 15 words why Oga MAT run comot for im village come Lagos?
9. Before Oga MAT begin do Lagos taxi driver work, wetin e dey do?
10. Wetin be Oga MAT real name in full? And wetin dat MAT for im nickname stand for?
Una go see name of di winner next week.
Make we jam again next Saturday.
Tank you
Tank you very much
And tank you very, very much indeed
*Created by Sunny Okim, Oga MAT (Day-to-day experiences of a Lagos taxi driver) is the longest running Pidgin column in Nigeria’s media, since 1994.
