Last week I say make I do Bonanza wey I go take do reward people wey dey read my sweet, sweet tori every time, I no know say I don carry babanla wahala put for my head.
My broda, as people see say 20k prize dey wait for di winner of di question dem wey I ask about Oga MAT, come see as everybody rush to answer di question dem.
I jus see people send answer dem from left, right and center, sote di battery of my torch light chinko phone peme. Some people even send dia answer four times.Tori Olorun!
Na im I take know say true, true ebi npa wa for dis our Naija under dis Emilokan gofment.
But di ting be say, nobody answer all di 10 question correct. Some get 7/10, some get 8/10, some get 9/10. Nobody get 10/10.
Dose people try gan, but dem no get all. Na im make I say, dis week, make I bring back di same question dem, weda or wedan’t sombori go fit get 10/10 make e win di 20k.
Dis one no be kalokalo or Ponzi. I no be JAMB wey go collect your money to take do dia exam, dem go still jam you. No be juju be dat?
Make una try di question dem again, na di last chance be dis:
1. Wetin be di name of Oga MAT wife and dia two woman pikin dem?
2. What part of Lagos gan gan Oga MAT dia garage dey?
3. List name of any 3 member dem for Oga MAT dia union branch
4. Who be Sikiratu and wetin be di sweet name wey Oga MAT dey call am?
5. Every evening wen Oga MAT close for work, e dey go nack im Usual for one joint before e begin go house. Wetin be di name of dat joint?
6. Which area for Lagos Oga MAT dey live with im family?
7. Wetin be di name of Oga MAT landlord?
8. State in not more dan 15 words why Oga MAT run comot for im village come Lagos?
9. Before Oga MAT begin do Lagos taxi driver work, wetin e dey do?
10. Wetin be Oga MAT real name in full? And wetin dat MAT for im nickname stand for?
Una go see name of di winner next week.
Make we jam again on Saturday.
Tank you
Tank you very much
And tank you very, very much indeed
*Created by Sunny Okim, Oga MAT (Day-to-day experiences of a Lagos taxi driver) is the longest running Pidgin column in Nigeria’s media, since 1994.
