I jus dey pray say make Eledumare get pity for us man pikin dem wey dey for Lagos.
Di kind orisirisi trap wey Lagos sisi dem dey set for man pikin, e too much.
If dem try one ting and e come be like say people don come sabi dat ting, dem go change am, try anoder system.
E come be like say na only how to set trap to take tear man dia pocket patapata na im all dis Lagos sisi dem dey siddon dey plan everyday. Tori Olorun!
Na so I siddon yesterday for our garage wey dey near under Ikeja bridge, two sisi waka come. Dem tell me make I carry dem go Balogun market. I say oya nah. Dem say dem dey go do shopping, weda I go wait, after dem don buy wetin dem wan buy finish, I go carry dem come back for Anifowoshe for Ikeja.
I tell dem say to carry dem go Balogun market for Isale Eko, dat one na drop, e get im own price. But to wait for dem and bring dem back to Ikeja, dat one na charter. Dem ask me di price of di two both of dem, I tell dem. Dem say make I carry dem for charter. Quick, quick di yellow sisi comot money for purse, pay me complete. Olorun Oba o!
Wetin I dey wait for? No be money I find come for Lagos?
I open my guonguoro door kia kia, di two both of dem siddon for backseat. I close di door, salute dem, den run go open my own door and jump inside for steering. I open ignition, start di engine, put am for gear one, and off we go.
We no even reach Ikeja Roundabout wen dis two sisi dem begin nack tori.
And wetin dem dey talk, all na about how dem dey set trap for man to drop pay.
(To be continued)
Make we jam again next Saturday.
Tank you
Tank you very much
And tank you very, very much indeed.
*Created by Sunny Okim, Oga MAT (Day-to-day experiences of a Lagos taxi driver) is the longest running Pidgin column in Nigeria’s media, since 1994.
